NASIIHAAJI FUL'BE (1)

De
Dr. Aliyu U. Tilde

1. Fa Jowman e inde maaɗa fuɗɗaimi ƴimre am
Fa kuungal to fuɗɗaayii e maire fa barkataa

2. Fa Jowman bo antan woodi ilmuu ko wangini
E ɗum suuɗi andal maad'a heuti a majjataa

3. To an yusɓi goɗɗum fuu fa laa shakka yusɓake
Fa an nooddateeɗo Al-Hakiimuu mi yeddata

4. Mi noddiima yaa Jowman waraa faago niyya am
To naa jungo maaɗa waatuɗaa min mi waawata

5. Fa yimɓeji men helli de yusɓumi Hinnayee
Ɓe muuyii ɓe bii yam yaa Aliyyu a yusɓitaa

6. E hanki de yettii ɓerde am sab de jooɗake
De foodoi mi baitiijee Dawiiluu ɗe jippataa

7. Ɗe shaamai to nder bahriire nden shaaa ɗe laatakee
No men ngiita toɓɗam ha to August no shaamata

8. To ɗon bii mi Njooman ngal njahaangal mi tundake
Si naa an muyii ngal teppere ngo mi yaaɓataa.

9. A jaabo du’aare hokkoram hikma ɓeedanam
To an walliyam Njooman mi andii mi haasataa

10. Kadin fuu ko saatii haa jeyaaɓe mi anditi
To an hoiniɗum be balla maa naa ko saatataa

11. Mi ɗaantaaki sai nan mii bo Allahu jaaboke
Du’aare mi yerɓii yettake faa de jaɓɓitaa

12. To nii faa mi huuli ngonka haalaa mi tabbitii
Wala habde sai bahre Dawil haala eengataa

13. Mi semtaayi ngam non yerɓitiimii wo’oire faa
Mi hawtii e barkaa fuu nulaaɓe mi lildataa

14. E barkaaji Njowman waati ha yimɓe deenuɓee
E barkaaji maako ha to nuɗɗiibe ummata

15. E barkaaji defte ɗen Ceniiɗe a jaabo yam
Bi aa yam “mi andii ɗum ko ƴamtaa a sooyataa”

16. Fa ban hokkuɗaa Ɓii Binta fa ɓiɓɓe Foodiwoo
Basiiraaku nden andal e fahmu ɓe bimbataa

17. No Mamman Tukur Ɓi Ɓinta hokkaa de yusɓugoo
De Bushra’u maako yimre maude nde jaɓɓitaa

18. Yo faa hande men keppi bo maire to Hausa fuu
E juutal e mantoore Naboojo o tampataa

19. Fa mimmaa mi haɓɓii niyya yusɓuki yimre am
Nasiihaaje Fulbe inde mairee a tabbitaa

20. E haade Aliyyu dartoɗaa taa a accamoo
A wallamo windol baiti maire de saatataa

21. To faa haa o timmi jam o jooɗi o jangidee
To Mp3, Allahu Njooman o ƴamtataa

22. O caakoode haa Facebook, twitter e fuu babal
E WhatsApp e Email faa to website o yerɓataa

23. De yaaraa nde waate haa to Reediyoo nyalde fuu
E TV e satellite faa to shuud'ii b'e njangata

24. Waɗaa yimre nden barkaa to noppiiji Fulɓe men
Fa nanɗo nde fuu sai waata barka o barkitaa

25. Fa salli alaihi Annabiijo Muhammadu
E dow aalu’en fa ma sahaabo a ɓeeditaa

26. Muhammadu Mahmuuduu mo an ɓurni fil azal
Wala ko tangaaɗo dab e maaɗa o heutataa

27. Muhammadu handal ngam minen non a windi ka
To naa banye maako neɗɗo ibbii a faalataa.

28. Muhammad Rasulullahi ha maako ngaatuɗaa
Shafaa’atu yimɓe nuɗɗiniiɓe ɓe sooyataa

29. Muhammadu haa maako minen tagle ɗaɓɓataa
Wasiilata Yaumil Haqqi insan wa jinnataa

30. Muhammadu Mahmuudu mi saidake zaahiran
A waddii lilal Allahu taamman a ɓustataa

31. Nyaloomaare bojji min walaa neɗɗo andumii
To naa maaɗa, waatan haade maa bii "a halkataa”

32. To tee yimɓe raa ɓoggol nabiyyiijo tamboton
Fa yaa habbazaa minhu liman shaa’a umdataa

33. Muhammad o arɗoo nder nulaaɓe to yettakee
Imamun liruslillahi bad’an wa audataa

34. To nii faa mi jokki haade maaɗa mi jooɗakee
To faa ko a ɗakkam min Aliyyu mi dillataa

35. Mi accii ka ɗoo ngam Annabiijoo hinaa a non
Nyaloomaare fuu ann yimɓe maaɗa a hawtata

36. Mi ɗon singi jooɗii faa to wookaci wadda en
A ummo a ardo yaago Firdausi Jannata

37. To yabɗa to leydi ɗon mi jippinta teppe am
Mi ɗon ɓaawo maaɗa ngam mi mantoo mi mantitaa

38. Du’aare nde ƴammi daa ni Allahu jaabo yam
Wa salli alaihi wal ahibbaya jumlataa

39. Mi timmi muƙaddima jee Nasiihaaji laasara
Fa ya Rabbi juutin faa mi warta mi ɓeedita.

Alhamdulillah.

14/9/2015