DOLA! DOLA!! DOLA!!!

Dola dai ta ƙi sauraron rokon da muka yi mata tun watannin baya. Maimakon haka ma ta samu gindin zama ne inda Babban Bankin Nijeriya ya ce ta sheƙe ayarta yadda ta ga dama a ƙasar.

Yau sati uku ke nan da manajar bankina ta ce mun a farashin N350 za ta sayar mun da Dola ɗaya don biyan kuɗin makarantar yarona.

Don haka yau da na ɗauko sautin waƙar dola da na rubuta kwanakin baya don in turawa Prof. Bala Zulyadayn wanda ya bukaci jinta a sauti, sai na sake saurarenta. A nan na fahimci cewa ta fi ma’ana yanzu a kan lokacin da na rubuta ta.

Ina ga ba laifi ba ne in abokai na a kafofin sada zumunta suka sake karantata ko suka sauraren ta. Wadanda suke a jerin sunayen abokaina a Whatsapp za su same ta a ma'ajiyar sakonninsu ba da jimawa ba.

A sha ruwa lafiya.

DOLA

Ta Dr. Aliyu U. Tilde
__________________________________
Nazarin Aruli:
Bahari: Hazaj
Ƙafafu: Mafaa’iilun, mafaa’iilun, mafaa’il
Fiɗa: v - - - / v - - - / v - -
__________________________________

1. Jama’a ga Dola ta kai ƙurewa
Ga waye za mu koka mai iyawa?

2. Ya sassauto da Dola don mu rintsa
Farashi duk ya sabko ba dadewa?

3. Talakkawa mu sai gero da dawa
Da shinkafa da maiwa don ciyarwa?

4. Iyalai kowane in zai ɗa’ami
Da yalwa za ya yo ba ya gazawa?

5. Ga dukkan mai kudi birini da ƙauye
Ya wala ko’ina ba takurawa?

6. Hakan nan babu tsoro zuciya tai
Na cewa za shi karye yai rasawa?

7. Ga Allah shi kaɗai za mui du’a’i
Da hannaye na bawa mai gazawa.

8. Suna kallon sama an buɗaɗasu
Da gwiwa sha-ƙasa don durƙusawa

9. Da goshi mai tabo domin sujuda
Idanu kau hawaye ke zubowa.

10. Mutane yanƙasa mun tambaye ka
Bare manya a Kaaba sun tsayawa.

11. Muna neman ka kawo naka ɗaukin
A bayan duk dabara ta gazawa.

12. Zato yau ya zame ba a batunai
Ɗabibi ya gaza ba ya iyawa.

13. Idan ciwo ya kai wannan muƙami
Fa Allah shi kaɗai zai sauwakewa.

14. Idan iska ta taso masu jirgi
Na kan teku ga wa za sui kirawa?

15. Ga Allah Wahidun ne za su koma
Kira za sui dawaman ba tsayawa.

16. Fari shi ma idan ya sabka mugu
Da yunwa duk ƙasa ba ƙosasarwa -

17. Ga waye za a koma don ya amsa
Ruwaye sui ta sabka ba riƙewa?

18. Ga Allah ne mukan koma gaba ɗai
Da manya har da yara ba ƙiyawa.

19. Ya amsa mui ta murna har mu gode
Mu ce hamdan ga rai mai tausayawa.

20. Gaban zaɓe mukai wannan du’a’i
Muna neman ka bai wa mai kulawa.

21. A sannan ga bala’i kulla nau’in
Da sata ba tsaro sai cutatarwa.

22. Ka amsa kai kaɗai mun shaida wannan
Ka kawo shugaba mai kyautatawa.

23. Ƙasa duk tai ta murna don ijaba
Ta sa rai za ta canza ba jimawa.

24. Da farko mun zata an kama turba
Lamurra sun yi sauki ba dadewa.

25. Ɓarayi anka gurfanar a kotu
Kuɗaɗe anka kwace ba ƙidawa.

26. Dola ma sai ta sabko lokacin nan
A Wafa har a metan sun sayarwa.

27. Ta fetur kasuwa ta zo da nauyi
A kullum faduwa ne ba tsayawa.

28. Da kaiwa tai talatin sai ya zango
Farashi babu ƙari ba ragewa.

29. Ga ma Naira da gangan tab biyo shi
Yana sauka ta na bi ba tsayawa.

30. Dola kau sai ta culla can sama’u
Ta ninka har ta zarce ba ragawa.

31. Farashi duk na kaya sai ya miƙe
Hawa komi yake ba tausayawa.

32. Ashana, dankali, dawa, timatir
Suga, magi da mai sai tsawwalawa.

33. Talakkawa muna kuka a kullum:
Dola da ma ki sabko ba jimawa.

34. Farashi kau na fetur yai sama’u
Ya culla har ya metan ba ragewa.

35. Basira tai yawa gun shugabanni
Su sa himma ga noma sui riɓawa.

36. Kaza himma ga tono madinanmu
A sa jari a duk ba togacewa.

37. Matasa sui ta aiki kulla yaumin
Kwafa, yunwa su kau ba dakatawa.

38. Mu zan ƙwambo da yanga don wadata
Gida har ma maƙwabta sui yabawa.

39. Wurin aiki su nema duk su samu
Su koma sui ta hirar walwalawa.

40. Ta’ala mun kira ko za ka amsa
Cikin tsoro da sa rai ba ƙiyawa.

41. Aliyyu zai tsaya ƙarshen ƙasida
Hazaj tuƙa ya kawo ba musawa.

42. Ya tura can ga Farfesan Aruli
Bala ɗan Zulyadayn don bincikawa.

43. Salati ko da yaushe ba iyaka
Bisa Manzonmu har ranar tiƙewa.

Tammat bihamdillah

27 Fabrairu, 2016